चिनियाँ कूची नेपाली सौन्दर्य

केही समयअघि उनी नेपाल आएका थिए । घुम्नु र रमाइलो गर्नु मात्रै उनको उद्देश्य थिएन । रिक्सा र ट्याक्सी चढ्दै उनले राजधानीका विभिन्न स्थान चहारे । खासगरी नेपालका भौतिक सम्पदालाई सूक्ष्म नजरले नियालेका चिनियाँ कलाकार चाव ज्येन छ्यौलेले चित्रमार्फत तिनलाई जीवित बनाउने कोसिस गरेका छन् । चीन फर्किएपछि क्यानभासमा उतारेका ६० चित्रकला लिएर यति बेला उनी प्रदर्शनीका लागि नेपाल आएका छन् । कुनै व्यापारिक उद्देश्यभन्दा पनि नेपाल र चीनबीच कूटनीतिक सम्बन्ध विस्तार भएको छ दशकको अवसरमा उनले एकल चित्रकला प्रदर्शनी गरेका हुन् । बबरमहलस्थित आर्ट काउन्सिल ग्यालरीमा चलिरहेको प्रदर्शनीमा चाव ज्येनले केही नेपाल र केही चीनकै परिवेशमा सिर्जेका चित्र राखेका छन् । घरको छानो, वरिपरिको सौन्दर्य, प्राकृतिक दृश्य हेर्दा कुन नेपाल र कुन चीन छुट्टयाउन गाह्रो पर्छ । उनको कलाको खास विशेषता मानवीकरणभन्दा पनि प्राकृतिककरण नै हो । प्राकृतिक सौन्दर्य चिनियाँ कलाको मुख्य विशेषता नै रहेको उनले बताए । ‘प्रकृतिलाई माया गर्ने र कलामा उतार्ने हाम्रो परम्परागत शैली हो,’ उनले भने । ‘पानीमा सुतिरहेका घरहरू’ शीर्षक चित्र उनले चीनको यही शैलीमा उतारेका छन् । समुद्रको किनारामा बनेका ससाना घरहरूको सुन्दर दृश्य चित्रमा छन् । चीनका हिमाल, पहाडी भेग, कृषि, ग्रामीण दृश्य पनि उनले चित्रमा महत्त्वपूर्ण स्थान दिएका छन् । ‘जन्मभूमिको गिर्दो सौन्दर्य’ चित्रमा उनले सकारात्मक धारणा प्रकट गरेका छन् । उनले यसमा भत्किएको भवनमा लुकेको सुन्दरतालाई चित्रको मुख्य विषय बनाएका छन् । ग्यालरीको माथिल्लो तलामा चाहिँ नेपाल सम्बन्धी चित्र राखिएका छन् । ‘पशुपति मन्दिर’, ‘भक्तपुर दरबार’, ‘वसन्तपुर दरबार’, ‘पाटन दरबार’ लगायत नेपालका धार्मिक र ऐतिहासिक मठमन्दिर चित्रमा हेर्न सकिन्छ । असनको बिहानी बजार, कुमारी मन्दिर क्षेत्र, पनौती हुँदै त्रिशूली, पोखरा र माछापुच्छ्र्रे हिमालसम्मका दृश्यलाई उनले क्यानभासमा उतारेका छन् । अरनिको राजमार्गमाथि कोरिएको चित्रले भने सिम्बोलिक रूपमा नेपाल(चीन सम्बन्धलाई अथ्र्याउँछ । चित्रको शीर्षक नै छ( ‘अटुट बन्धन’ । प्रदर्शनीमा राखिएका सबै चित्रको रंगले पनि धेरैको ध्यान आकर्षित गर्छ । कुनै भडकला र चम्किला रंग नपोती उनले ब्ल्याक एन्ड हाइटमा चित्र उतारेका छन् । अर्को विशेषताचाहिँ विषयसापेक्ष रंग छनोट हो । चिनियाँ इंक वास पेन्टिङको माध्यममा उनका चित्र सजिएका छन् । ‘ब्रस,’ ‘स्वार पेपर’ (चिनियाँ कागज), ‘इङक’ र ‘इङक स्ल्याब’ गरी चारवटा सामग्रीको सहायताले चाव ज्येनले चित्र कोरेका हुन् । उनले सोमबार यिनै माध्यमबारे नेपाली कलाकारमाझ जानकारीमूलक कार्यशाला चलाए । आउँदो नोभेम्बरमा बेइजिङ नेसनल म्युजियममा पनि यी चित्रहरूको प्रदर्शनी हुने उनले जनाए । सिद्धार्थ आर्ट फाउन्डेसनको सहकार्यमा गरिएको प्रदर्शनी एक साता चल्नेछ ।